政情：麥富寧為月餅上法庭
好多議員為博選民支持，過時過節總要搞吓蛇齋餅糉，但因為蛇齋餅糉而搞到要訴訟，又有冇議員試過呢？觀塘區議員麥富寧就係其中一個，皆因佢喺去年中秋節派月餅派出禍，以致有九百個月餅成為證物，要放喺佢議員辦事處大半年，直到最近先至可以丟棄。
賠三千七百元 稱食死貓
我哋早前收到投訴，話觀塘有位姓麥嘅議員訂多咗月餅就賴帳唔找數，經細問之下，涉事嘅姓譚嘅男子自稱做義工，去年中秋節前夕幫議員麥富寧向朋友訂咗一千個月餅，但事後麥富寧唔認帳，話只訂咗一百個，每個售價都要十元，所以一怒之下告上法庭。官司喺上月底判決，最後庭外和解，而麥富寧就賠償咗三千七百元了事。
麥富寧回應查詢時話，對事件好無奈，亦好谷氣，簡直就係食咗死貓，但都無符。點解？佢話因為嗰位姓譚男子係位七十多歲嘅老人家，可能一時聽錯佢講嘢喎。佢又話，雖然條氣仲係好唔順，但為咗一了百了，惟有忍痛，同法官及原告討價還價後，畀咗三千七百元化解件事，強調以後會小心啲咁話。不過，麥富寧質疑，喺官司期間，呢位老人家周圍污衊佢，所以會保留呢個追究權利喎。