政情：李鋈麟七一鬥搶客
學者提出嘅「佔領中環」行動繼續喺社會發酵，有泛民主派仲計劃喺七一做「佔中」預演，但另一邊廂建制派亦接連出招抗衡，除咗搞「遍地開花」嘅嘉年華會外，全港各區工商聯會長李鋈麟牽頭喺七一搞商舖食肆半價大酬賓，仲講到明限定當日下午二時至五時，擺明同七一遊行搶客正面對撼。不過，有人擔心若大酬賓有些少貨不對辦，又萬一有市民買唔到平嘢，隨時幫倒忙，好心做壞事。
目標一萬間 冀百萬人受惠
「佔中」預演如箭在弦，建制派嘅林林總總大龍鳳活動亦曝光，就連經濟不景氣先推出嘅商戶特惠日都搬埋出嚟。李鋈麟尋日出席午餐會後爆料，佢牽頭喺七一搞商舖食肆半價大酬賓，由下午二時至五時舉行，鼓勵市民消費。據聞已答允參加嘅商舖有一千多間，包括大型連鎖化妝品公司、時裝品牌等，連大型連鎖快餐店都有份，目標係想一萬間商舖參加，實際折扣會由半價至八折不等，希望有一百萬人受惠。
李鋈麟雄心壯志想益街坊，但時間巧合撞正遊行嘅黃金時段，話佢無心搶客都冇人信。不過，有人對呢招搶客嘅成效存疑，事關有心參加七一遊行者，仍然可以先買平嘢後參加遊行。如果想用呢招搶客唔係唔得，相信要將大酬賓限定喺九龍同新界嘅商舖舉行，市民買得平嘢自然趕唔切返港島遊行啦。
爭買平嘢 恐深化中港矛盾
此外，據聞呢次大酬賓無講明港人優先，換言之港人同旅客都可以受惠，原意係想做到皆大歡喜。不過，中港矛盾不斷深化，內地客同港人會否為爭買平嘢而激化矛盾，李鋈麟又有冇多加留意同提防呢？另外，如果大酬賓限制多多，只有少數貨品有折扣，到時「雷聲大，雨點小」，非但唔可以營造「購物熱」，到時投訴滿天飛嘅時候就真係得不償失喇。
所以話說回來，喺七一搞半價大酬賓講到天花龍鳳都冇用，講到尾都要有個周全安排同計劃，否則到時添煩添亂要其他人執手尾，咁就真係唔搞好過搞喇。