中環出更：買龍蝦燒烤「厚」待舅仔
燒烤係港人喜愛嘅消閒活動，但大熱天時燒烤就似乎熱咗啲喎。不過，馬會大董利子厚（Michael）就唔怕熱，事關卓妮前日見佢同舅仔喺中環ifc一間超市選購燒烤食材，佢哋並唔係買雞翼或腸仔呢啲咁大路嘅貨色，而係買生猛游水龍蝦嚟燒烤，認真識食。
舅仔蒙古籍 少品嘗海產
Michael話，佢舅仔係蒙古人，近日嚟香港度假，而佢身為姐夫梗係要好好招待舅仔啦，所以佢就同太太邀約咗兩三位好友到屋企開燒烤大會。
鑑於蒙古人嘅飲食習慣係鍾意啖啖肉，加上蒙古國位處內陸難以品嘗海鮮，所以Michael同舅仔一踏入超市就先揀選幾件靚牛排，然後一齊到海鮮專區，於琳瑯滿目嘅新鮮海產之中挑選三隻生猛游水龍蝦，仲委託店員代為清洗同開邊斬件，務求返到屋企就可以立即放上烤架，夠晒方便。
雖然蒙古人鮮有品嘗海鮮嘅機會，但海鮮又唔一定令到蒙古人垂涎。Michael話，蒙古人由於較少接觸海產，因此對於海鮮嘅腥味零舍敏感，好似佢太太曾經喺新加坡生活過好幾年，比較接受海產嘅氣味，但仍會偏好口味較濃嘅烹調手法以求辟腥，而胡椒炒蟹就係佢太太喜愛嘅海鮮菜式。
Michael又話，唔好誤會蒙古人只係懂得烤肉，其實蒸炒燉灼嘅煮食方法亦曉得運用，除咗牛羊之外，蒙古人仲好鍾意食餃子，但總體嚟講都係多肉少菜。
唔怪得Michael嘅超市購物籃中，用嚟燒烤嘅蔬菜唔係太多啦！
卓妮