政情：「香港人」又分裂 一開三
六四事件廿四周年臨近，港台《城市論壇》循例邀請泛民主派嘉賓討論六四，嘉賓名單多咗個「港人自決 藍色起義」（HKBRR）組織嘅發言人叫陳梓進，呢位人兄咪就係經常高舉龍獅旗上街嘅網上群組「我哋係香港人，唔係中國人」核心成員？原來「香港人」早前內訌經已一拆三，除咗HKBRR，仲有一個叫「香港人優先」，咁多個名真係令人頭都大埋。
陳梓進過去經常就中港矛盾發表激進言論，更多次公開高舉龍獅旗反雙非、反水貨客，帶挈「香港人」喺社交網站累積三萬幾個「讚好」。正當以為「香港人」成功上位，原來陳梓進同幾位核心成員早已對群組「有唔方便講嘅矛盾」，已經喺三月拆夥，四月另起爐灶HKBRR。
陳梓進承認本來得五、六十人嘅「香港人」經一拆三後規模縮到得番廿人，但無奈「政見唔同，夾硬喺埋一齊都冇意思」。咁所謂嘅政見分歧又係咩？陳梓進就話，好似佢哋想六四當晚喺尖沙咀鐘樓搞悼念儀式，但「香港人優先」就想去中聯辦燒烤「悼念」咁囉。佢又解釋，呢個組織無意搞港獨，又話藍色係自然嘅顏色，唔係懷念英國旗喎。