天有不測之風雲，人有霎時之禍福。假如你係秀茂坪順安道附近嘅居民，呢兩日嘅命運可以用命途多舛嚟形容，事關一場黑色暴雨帶來山泥傾瀉，成條順安道被泥沙覆蓋。順安道事發現場正進行斜坡工程，嘩啦嘩啦嘅傾盆大雨沖破圍板，攻陷護土牆，泥水夾雜碎石好似瀑布咁不斷湧出，路上行人迫於無奈除鞋赤腳涉水而過，簡直狼狽到不堪。
天氣之所以惡劣成咁，元兇係一道徘徊於廣東沿岸地區嘅低壓槽，為本港帶來連場大雨以及狂風雷暴，引發部分地區水浸同山泥傾瀉。天文台昨日早上四時十分發出黑色暴雨警告訊號，對上一次黑雨已經係一○年七月嘅事。換言之，香港差不多三年以來第一次受到黑雨蹂躪。
雷電交加劃破黑夜長空，雖然對於唔少攝影發燒友而言係難得一見嘅天文現象，不過對於生活喺低窪地帶嘅居民就慘無人道嘞。政府部門接獲幾十宗水浸報告，其中兩個水汪汪嘅災區係觀塘道行車隧道，同埋紅磡海底隧道。有一架的士凌晨時分駛過紅隧，車內乘客拍攝到隧道嘅水浸情況，的士猶如「陸上行舟」。網民七嘴八舌議論紛紛，有人形容為「香港終於有水上的士」，亦有人話呢條係真正嘅「海底」隧道。
唔知大家點睇，功夫茶就覺得非常之咁危險。你知啦，紅磡海底隧道係一位年事已高嘅建築界耆英，上世紀七十年代落成以來已經服役幾十年，年中無休日日夜夜不斷接客，接客量一早超出本來預算。年紀大少不免機器壞，紅隧若然日久失修，最終頂唔住連場暴雨，到底會唔會造成車毀人亡嘅大災難o架？
功夫茶絕對唔係杞人憂天，大家應該記得日本山梨縣曾經發生過隧道坍塌事件，慘劇導致多人死亡，肇事原因同日久失修有莫大關係。日捱夜捱嘅紅隧會唔會重蹈覆轍呢？真係好難講囉，不過今次嘅水浸應該可以話係響起警鐘，起碼隧道嘅排水系統有必要詳細檢查，否則後果可大可小。
講到排水欠佳，香港仲有好多地方非常之咁頭痕，基本上每逢暴雨必水浸。好似元朗洪水橋田心村咁吖，今次黑色暴雨搞到水深及膝。田心村村民話呀，當地一有大雨就浸到亂七八糟，毫無疑問係負責排水嘅渠務出咗問題。
功夫茶想問一問渠務署，點解香港作為一個理論上安定繁榮嘅國際大都會，仍然會有咁多渠務不通嘅水浸報告？收咗納稅人嘅錢個個月出糧，居然連最基本嘅渠務工作都未做好，實在太搵笨喇啩！
點都好啦，麻煩各大單位醒醒定定，如無意外今次黑色暴雨只係前奏，橫風橫雨嘅風季即將來臨，記住未雨綢繆呀！