學生參加辯論比賽，一開始就定咗自己企喺正方定反方，立場一早定晒唔會改，情況喺立法會其實都係一樣。所以尋日無論勞工及福利局局長張建宗點解釋最低工資係跟得上通脹，議員都掩住耳仔繼續講自己嗰套，講到張建宗有啲火滾。
最低工資今個月起由廿八蚊加至三十蚊，勞聯立法會議員潘兆平（潘少）尋日喺立法會提出口頭質詢，質疑新最低工資升幅只有百分之七點一，唔足以保障基層勞工。三位勞工界議員亦都陸續向張建宗發炮，話三十蚊追唔上通脹，但張建宗就好似教小學生上堂咁逐個教佢哋計數，話最低工資水平調升百分之七點一，大約係三十蚊四毫，非常接近過去兩年累計百分之八點四嘅通脹率。
議員張國柱之後問點解政府唔用方程式逐年調整最低工資金額，但就被張建宗反駁依家幾乎所有國家都用一籃子因素計算社會福利，又話方程式未必準確反映民情，之後又火滾咁講「如果方程式計到通縮，咁你係咪減先？」
