政情：峰爺化身「浴」海浮Duck
金融服務界議員張華峰（峰爺）向來屬於重量級人物，一個人等於兩個人，夠晒噸位。唔好以為佢咁重分量就唔熟水性，峰爺自爆身形有先天性優勢，唔識游水都識浮。立法會同僚林健鋒（Jeffrey）可能就係睇中佢呢點，話已經幫佢報咗名，參加國際龍舟邀請賽。
李大壯「最佳拍檔」
當大家都幫手諗吓峰爺喺隻龍舟度應該坐喺邊個位，至唔會令隻龍舟「沉船」，Jeffrey就話，當然唔係叫峰爺扒龍舟啦，原本嘅諗法，係參加咗龍舟賽其中一項「名人划浴缸比賽」，推薦峰爺同梁美芬一組，一男一女夠晒搶鏡，真係諗起都夠精彩。點知美芬打晒退堂鼓唔想上浴缸，峰爺亦唔想同美芬一組，反而覺得自己同港台經濟文化合作協會副主席李大壯夾啲，因為大家差唔多重量，可以互相平衡，無咁易反「艇」喎。
峰爺仲透露，為咗食住鴨仔熱潮，打算比賽期間以「肥鴨」打扮亮相，希望以肥鴨配浴缸，贏取最佳打扮獎，又話今次贏唔贏到係其次，最緊要帶畀市民歡樂，犧牲色相都唔計較。峰爺呢兩日情緒咁高漲，仲開心過中六合彩，唔知佢因咩事咁開心呢？