立法會議員愈來愈多，但唔守規矩嘅情況愈來愈普遍。好似立法會內設有咪架，供議員發言時傳媒放咪及錄音機用，但民主黨總幹事林卓廷就當正自己係議員，過去一個月竟然多次喺立法會咪架前發言，令其他建制派不滿。
由於林卓廷做過廉署調查主任，所以最近成為「貪湯」湯顯明事件嘅狙擊手，但佢多次喺立法會擅用咪架發表言論。本來無乜人留意呢件事，但議員黃定光（象哥）喺電視上見到後就把幾火，覺得白鴿黨無晒規矩，所以喺日前行政管理委員會上，象哥即刻拎件事出嚟傾。象哥話，只要秘書處講明准許非議員用立法會咪架，佢唔會有不滿，因為佢會叫晒黨內班兄弟落立法會，到時睇吓邊個黨多人啲囉。嘩，象哥今鋪真係好有霸氣，連出名惡嘅白鴿黨主席劉慧卿都唔敢出聲反擊。
象哥嘅不滿原本唔喺行管會會議嘅議程上，不過討論之後，大家就決定發出一份備忘錄畀全體議員，提醒佢哋唔好畀黨友亂用立法會設施。
喺立法會入面開記者會，當然係好方便啦，因為周不時都有各大傳媒代表齊集，不過各黨都應該檢點啲，好似今次咁畀人話就唔好啦。