政情：日圓下跌 恐掀加價潮
近期日圓跌到五年前低位，據聞仲有得跌，唔少人都暫時忘記福島核事故嘅陰影，去日本平玩番轉。主要經營日本及韓國旅行團嘅縱橫遊業務顧問袁振寧話，由四月至今，經佢哋公司報名遊日嘅人數已有兩成幾升幅，認真豬籠入水。不過佢話，唔希望日圓跌得太急，否則會觸發旅行團團費及機票加價潮，到時旅費可能仲貴過日圓未跌時。
袁振寧日前孖住太太現身一個活動，佢話，近日太多人同時湧去日本旅行，搞到航空公司好頭痕，事關早前新型號波音七八七客機因事故停用，最大規模嘅國泰航空公司又借咗部分飛機畀同業，令飛機數目供不應求，亦唔係一時三刻可以解決到。就算搵到飛機，又要調配空中服務員人手，到時員工係咁加班，又會引伸出其他問題。
九州北海道易加開航班
據佢了解，最快可以加開航班嘅地方係九州，因為航程短，較易調配小型嘅客機，其次係北海道同鹿兒島。機位咁渴市，變相鼓勵航空公司加價，袁振寧預計，由於暑假係外遊的高峰期，到時機票將會加價一至兩成。