政情：貪曾 大花筒愛排場
「貪曾」前特首曾蔭權爵士貪盡海陸空，歎盡省港澳嘅惡名昭著，佢嘅惡行真係數極都數唔完，最近再有資料印證貪曾揮霍無度，事關貪曾同現任特首梁振英（CY）同樣係去北京述職，前者隨行人員有五、六人，總開支最低消費係七萬多元，最高幾乎要開支十萬元，後者首次述職花費僅為約六萬五千元，兩者差距最多有三萬五千元，呢個正好說明只要貪曾一日在位，佢嘅貪得無厭嘅性格真係歷久不衰！
外訪使十萬 市民眼火爆
東方報業集團去年二月獨家連日踢爆貪曾貪腐醜聞，之後貪曾又被踢爆外訪期間多次入住總統套房，佢貪威識食嘅例子真係俯拾皆是，特別係有比較下更加明顯不過。話說尋日特首辦公布CY去年十月至十二月嘅外訪開支，CY喺呢段時間先後外訪兩次，首次係去年十一月底出席喺海南三亞舉行嘅泛珠論壇，總開支係三萬八千多元，當中超過八成用於旅費。至於第二次外訪係去年十二月下旬，當時CY到北京述職，隨行人數只有四個，總開支係約六萬五千元，包括近四萬一千元旅費，並註明獲贊助住宿同市內交通。
本來淨係睇CY外訪開支無乜特別，不過一比對貪曾任內同樣到北京述職，就知道貪曾真係「大花筒」，事關佢喺○七年起連續五年，每年年底慣常都會到北京述職，隨行人員次次都要五、六個，明眼人都睇得出一定係貪曾鍾意排場同有人氣傍住，而且又鍾意畀人前呼後擁。
講到總開支，貪曾每次述職嘅最低消費都要七萬一千多元，其中○九年個次整個外訪開支係八萬九千多元，一○年嗰次更花費近十萬元。作為納稅人，睇見呢條數，好難唔眼火爆。好多時外訪，佢仲帶埋老婆一齊去，開支更多。
所謂唔好大教壞細，佢咁外訪一闊三大，作為佢嘅下屬點會識慳家？咪以為一切排場都係應分嘅囉，終於就有佢嘅好兄弟貪湯湯顯明啲咁嘅廉政專員。貪小便宜同濫權，呢啲真係貪曾嘅核心價值嚟o架。