中環出更：趙式慶偕師傅 著書教洪拳
華光船務趙世光同何琍琍之子趙式慶熱愛中國武術，佢好感慨香港人近年愛打泰拳，反而國術就喺香港日漸式微。趙式慶就聯同佢嘅師傅林鎮輝寫咗一本洪拳入門嘅書，期望國術文化得以弘揚。
感慨國術在港式微
有三百年歷史嘅洪拳，據講由福建少林傳至黃飛鴻，再由黃飛鴻授予綽號豬肉榮嘅徒弟林世榮，而趙式慶嘅師傅林鎮輝，就係林世榮嘅後人。趙式慶話八年前因人類學碩士課程一個研究題目，於朋友介紹之下認識林鎮輝師傅，大家一見如故從而建立師徒關係。有感於近三十年武術喺香港走向式微，於是趙式慶就同林鎮輝師傅合作，以文字配合圖片嘅方式，將口傳身授嘅洪拳基礎與精髓都記錄於書籍當中。
自稱係林氏洪拳第四代傳人嘅趙式慶發現，醉心武藝以外國人佔大多數，基於市場因素，今次新書以英文出版。佢話本地人要講求快速見效，近年潮流興習泰拳，皆因泰拳動作比較易上手。反觀洪拳之類嘅國術，花一年半載都只係掌握基本招數。
卓妮