雖然話神州大地乜都假，山寨貨色充斥市面，黑心食品無處不在，不過香港其實都有好多騙子，一不小心你就會淪為人肉提款機。騙子予取予攜，苦主欲哭無淚，所以你身處香港都唔可以安枕無憂o架，唔想做水魚就必須打醒十二分精神。
騙子嘅欺詐手段包括推銷酒店及餐飲會籍，消委會去年接獲一百二十四宗相關投訴，當中一半涉及不良推銷，行為卑劣到極，所以消委會提醒消費者，如果懷疑有欺詐成分，可以向警方舉報。
其中一個被搵笨嘅投訴者梁先生，一○年購買咗A公司的餐飲會籍，雖然講明一年之後唔會續約，不過A公司嘅職員竟然幫佢自動續約，由梁先生信用卡戶口扣取二千一百元會籍費。梁先生跟手向公司經理投訴啦，並且得到承諾會籍到期會退回款項。梁先生及後又收到另一職員致電，聲稱可以幫佢刪除資料以免繼續受到推銷，不過要梁先生再次提供信用卡資料。跟住發生嘅事就離晒大譜嘞，梁先生發現A公司為佢另外買多一個會籍，另外再扣二千一百元！
呢嗱嗱嗱，你話行為係咪卑劣到極吖？即使梁先生向消委會投訴，最終都只係得到A公司退還一個會籍費用咋。
另一個投訴者係趙小姐，經過推銷員一輪口甜舌滑嘅游說之後，買咗五星級酒店及餐飲會籍，聲稱可以享受免費住宿。不過當趙小姐想入住酒店嘅時候，對方居然話要收錢喎，簡直吹到啤一聲。
所以話啫，大家唔好以為只有國內同胞先至呃神騙鬼，亦都唔好以為只有中國官僚先至大話連篇，明明毒奶粉成行成市，佢哋眼都唔眨拍心口保證「國產奶粉質量比進口奶粉優勝」。講真吖，香港一樣騙子多，除咗不良推銷之外，當遊客係羊牯咁劏嘅黑店亦係禁之不絕。比較好彩嘅係消委會仍然接受投訴，唔似得內地有冤無路訴，想話擊鼓鳴冤討個公道啫，隨時會因為「維權人士」嘅身份而受到無情打壓。
香港騙子之多真係唔講得笑o架，大家有冇諗過納稅人同樣係消費者？交咗稅當然希望以公帑出糧嘅官老爺提供優質服務啦，點不知事與願違，一個二個以權謀私，前特首曾蔭權係咁，前司長許仕仁係咁，前專員湯顯明又係咁。最搵笨嗰個係推銷員出身嘅貪曾，佢競選特首嘅時候莊嚴承諾「我要做好呢份工」，結果完全係一種不良推銷手法，行為卑劣到極，曾經投過神聖一票畀佢嘅選民變成被騙嘅傻瓜。
點都好啦，功夫茶勸大家帶眼識人，不良推銷手法五花八門，被騙先至呻笨就太遲嘞。