「貪曾」前特首曾蔭權爵士同佢嘅愛將「貪湯」前廉政專員湯顯明呢對難兄難弟，任內作為港府同廉政公署一哥，竟然好有默契咁各自豪花公帑周遊列國、瘋狂送禮兼豪飲豪食。依家貪湯率先現眼報，任內擦鞋博上位嘅爛招被前同僚逐一踢爆，面臨五路「追殺」下睇怕插翼難飛。不過，貪曾咪以為愛將貪湯被廉署刑事調查，自己嗰筆貪腐醜聞就可以告一段落，放心遠走高飛歎世界，相信貪曾處境正如自己當年講過嘅金句一樣，就算走到天涯海角，廉署都一定搵到你，冇咁輕易甩身嘅！
