政情：冇得斷尾消念頭 嫻姐諗過切乳抗癌
擁有魔鬼身材嘅荷里活女星安祖蓮娜祖莉（Angelina Jolie），近月為預防乳癌接受雙乳切除手術，有關消息曝光後引起全城關注。曾於○三年患有乳癌，切除左邊淋巴嘅立法會議員陳婉嫻（嫻姐）憶述，當年佢都有諗過切晒兩邊乳房，但醫生笑佢話其實切晒兩邊乳房都冇得斷尾，一切同賀爾蒙有關喎。
EQ讚安祖蓮娜樹榜樣
雖然切除乳房做法對嫻姐冇用，但為免乳癌復發，佢自此努力防患未然，戒食雪烚膏、燕窩同雞肉等會影響賀爾蒙嘅食物，其中雞肉就以雞胸肉做代替品，又會好好調理身體，盡量避免捱夜。同樣係現代女性嘅葛珮帆（EQ）同葉劉淑儀，尋日亦喺社交網站撰文撐安祖蓮娜。EQ大讚安祖蓮娜嘅勇氣為女性樹立良好榜樣，有助喚起全球關注乳癌情況。
葉劉都話，安祖蓮娜有關決定顯示佢個性堅強同果斷，值得世人學習，之後又提及自己身邊都有女性朋友曾患乳癌，佢哋除咗需要切除乳房外，仲要承受手術後嘅痛苦，可以見到媽媽嘅偉大之處喎。