政情：AO仔齋「看門口」 高達斌斥貪曾無建樹
近年多個撐政府團體相繼冒起，成功跑出嘅暫時只有愛護香港力量（愛港力）同愛港之聲，後者自從成功搞起元旦嘉年華同普選論壇後，漸漸為人熟悉，唔再被人將佢同愛港力撈亂。愛港之聲召集人高達斌（Patrick）就自爆，其實早喺「貪曾」前特首曾蔭權爵士打算連任時，已有意組織團體撐政府，奈何貪曾太唔爭氣，不屑撐佢。
「唔做唔錯」消極治港
Patrick透露，原本以為貪曾繼任兩年只係做「看門口」角色，估唔到貪曾會成功連任，佢亦睇唔過眼政務官（AO）出身嘅貪曾，只係抱住「少做少錯，唔做唔錯」嘅打工仔心態蹉跎歲月，毫無政治遠景，所以佢寧願等多五年，到新特首上場先至大展拳腳撐政府。
愛港之聲以「和平理性」包裝贏得唔少掌聲，早前有意搞網上電台嘅Patrick又話，籌備工作已經做得七七八八，仲發現YouTube先係最好嘅宣傳渠道，會着手邀請泛民、建制兩派嘉賓出席，希望兩派擦出新火花增加點擊率，宣揚愛港之聲理念。愛港之聲七月起仲有多項宣傳新招，詳情先賣個關子，唔知有冇機會蓋過愛港力風頭呢？