政情：「劈山」鋪路 助發叔女婿出選?

離島區議會共有二十一位議員，因為離島太大，島嶼太多，地域分得太散，所以一向河水不犯井水。其中總面積有一百五十平方公里嘅大嶼山選區，因為早年將東涌、愉景灣同逸東邨等選區劃分開去，所以該區再無南北之分，歸一成為大嶼山選區。該區區議員黃福根就向我哋呻話，佢個選區面積太大，平時服務居民做到索晒氣，所以建議將選區一分為二喎。據理解，向來好少有區議員會建議拆散自己選區，因為擔心流失選民支持者，影響連任嘅勝算。

服務範圍大 黃福根「喘氣」

有離島地區傳聞話，由於下屆區議會將取消委任議席，意味委任議員余漢坤如果想連任嘅話，就要參加直選，所以除咗年前同黃福根喺大澳及梅窩開聯合辦事處外，亦有傳黃福根一直幫佢搵位出選，同近日佢建議將選區分拆不謀而合。另有傳聞話，黃福根做埋今屆就退休，會將議席交棒畀余漢坤，至於成功爭取將選區一拆二嘅話，新增嘅議席就留畀有志服務地區嘅鄉紳喎，究竟係咪真有其事呢？

余漢坤日前出席寶蓮禪寺浴佛慶典時話，冇聽過黃福根話要退休，而且相信大嶼山分拆兩個議席嘅機會唔大，又話自己各區都有唔少老友，冇理由要老友讓位畀佢參選喎，所以一步一腳印，下屆冇得選就喺另一範疇服務社會咁話。黃福根話，八十至九十年代，大嶼山選區一直都分開南北兩個選區，但佢依家就要由南到北一腳踢，每日淨係見居民都要來回四十多公里，選舉時更要走勻九個票站，真係搞唔掂，所以先至建議分拆選區喎。

分拆大嶼山選區 當局或拒

不過，區議會一直以人口數目劃界，相信政府都未必會隨便分拆選區。黃福根就話，就算大嶼山二○一五年唔夠人口分成兩區嘅話，二○一九年都要分，所以籲政府及早規劃好大嶼山喎。