中環出更：高層扮超人 妄想打救醫管局
「超能先生」點解喺醫院管理局出現，仲要打孖上？醫管局昨舉行年度研討大會，醫管局行政總裁梁栢賢（PY）同主席胡定旭（肥胡）化身動畫《超人特攻隊》入面嘅「超能先生」。PY又用「醫管局憤怒鳥」即場示範將人手短缺等問題統統射死。肥胡就好感慨，引用徐小鳳名曲《順流逆流》歌詞，鼓勵醫護「得失要睇透」。其實依家醫護人員面對咁多壓力，佢哋話肥胡不如搞好啲管理，好過喺度扮嘢氹員工啦！
PY致詞年年都咁精彩，卓妮同佢唔少FANS一樣都有去捧場。當佢講到醫管局點面對未來問題時，螢光幕忽然彈出PY同肥胡扮成嘅「超能先生」，一手托起班醫管局員工，寓意佢哋帶領醫管局迎接挑戰。
「憤怒鳥」射走障礙
改圖一出，即時引來全場爆笑。PY講到醫管局面對人手短缺障礙時，一隻「醫管局憤怒鳥」已經喺丫叉準備就緒，示範點射散晒啲障礙，唔少在場女士見到隻憤怒鳥咁可愛，即刻舉起手機拍攝。
肥胡又主動反駁醫管局資源分配不均。佢舉例話，九龍中聯網超過六成住院同專科門診服務係提供畀其他聯網病人。瑪麗醫院亦會接收其他醫院轉介嘅奇難雜症，佢哋喺一二年總服務量中，超過三成半係為其他聯網病人服務喎。
卓妮