中環出更：愛女峇里結婚 王庭聰克服恐飛症
從事紡織生意嘅港區全國人大代表王庭聰，佢愛女王麗霞（Crystal）今年底將與拍拖五年嘅金融才俊邢高福（Jimmy）拉埋天窗。經營婚紗店嘅Crystal，決定披上自家設計嘅白色嫁衣，舉家飛往印尼峇里島舉行夢幻婚禮。不過，原來王庭聰有飛行恐懼症，早前到北京出席兩會時，寧願預早啲時間，由陸路乘坐高鐵赴京，但為咗愛女嘅終身大事，一於克服心理障礙飛上幾萬尺高空，足見父女情深。
禮金全數捐出做慈善
Crystal同Jimmy呢對準新人，定於十月尾喺峇里島最高嘅酒店舉行婚禮，認真浪漫。二人話，兩年前已開始籌備婚事，前年飛意大利影婚照，去年再喺澳門影多輯。Jimmy笑言，反正大家都有共識要結婚，早啲籌備咪唔使臨急抱佛腳囉！Crystal長兄王槐裕兩年前結婚，王庭聰就將兒子收到嘅賀禮捐晒畀自己擔任籌委會副主席嘅國際小母牛香港分會，今次亦都唔例外，會將女兒及女婿回港補擺喜酒嘅禮金全數捐出。
王庭聰話，為咗個女總之要搭飛機就搭啦，至於送乜禮物畀愛女，佢就話要保持神秘感喎！Crystal曾於日本修讀時裝設計，四年前回港得父親支持，喺尖沙咀開設高級婚紗店，主打日本及意大利婚紗。年紀輕輕嘅Crystal好有生意頭腦，首兩年租尖沙咀一個地舖，建立一定知名度後，先至搬到租金平三分之二嘅樓上舖，同時加強網上宣傳，結果生意有增無減。
卓妮