食肆霸道行人冇路行
佐敦文匯街食肆林立，多間食店更被評為「人氣食店」，惟老饕大快朵頤的同時，卻因食肆長期佔用行人路經營而令附近居民不勝滋擾。「午市、晚市同消夜，啲枱櫈都統統放晒喺條行人路，有噪音都不特止，就連條路都畀佢哋霸埋，想行返屋企都冇路，真係好離譜！」梁小姐直指情況已難以容忍，亦曾多次向政府部門投訴，可惜一直未見改善。
食物環境衞生署發言人證實，過去一年共接獲九宗投訴，過去三個月內亦曾兩度檢控上址違規食肆。發言人表示，除例行巡查外，該署亦不時採取突擊行動，以打擊違法行為。根據《簡易程序治罪條例》，任何人在公眾地方造成阻礙，可被判罰款五千元或監禁三個月。
「投訴咗咁耐都仲係咁，連食環署都搞唔掂，我哋啲小市民仲可以點？」梁小姐指上址阻街問題仍然持續，要求當局加強執法，以解居民困擾。