傳媒嘅天職係揭露社會真相，透過真相令到貪官污吏以及一眾牛鬼蛇神無所遁形。最佳例子莫過於東方報業集團獨家連環踢爆貪曾醜聞，令到呢一個前特首曾蔭權嘅貪婪嘴臉大白於天下。另一個炙手可熱嘅例子當然係貪曾嘅沙煲兄弟湯顯明啦，如果唔係傳媒肩負起第四權嘅監察任務，呢一個熱愛利用公帑送禮酬酢嘅前廉政專員都唔會備受各方關注，廉署最終有必要下定決心清理門戶立案調查，睇下佢有冇以權謀私。
好嘞，功夫茶問問大家，若然傳媒慘遭不法分子利用，搞到公信力下降，會有乜嘢後果呢？其中一個極端嘅後果就係，冇人信傳媒，個個信貪官，廉潔奉公嘅核心價值將會進一步受到破壞。
好衰唔衰嘅係神州大地乜都假，家陣連記者證都有不法分子推出冒牌貨，功夫茶少不免憂心忡忡，萬一招搖撞騙嘅假記者通街跑，呃到凡夫俗子甚至達官貴人四腳朝天，傳媒嘅公信力確係會受到嚴重損害o架。
最近喎，有一間名為「深圳市×××企業管理顧問有限公司」嘅物體，喺內地電子採購網站「阿里巴巴」招攬代理，聲稱可以向「香港新聞記者協會」申請「香港記者證」。網站詳細列明申請條件，例如申請者必須係傳播機構嘅記者、攝影記者或新聞業僱員，費用二千五百元人民幣，包括入會費、年費以及服務費，如一次過申請多個名額可獲價格優惠，申請者亦要繳交「年審費」港幣五百元。
唔知係以訛傳訛定係別有用心，內地多個網站亦刊登報道話喎，「香港新聞傳媒管理中心」於今年二月十九日首次發出香港記者證嘅統一版本。有鑑於此，香港政府新聞處指出，特區政府冇所謂「香港政府新聞管理局」、「香港特區政府新聞事業管理處」、「香港傳媒管理局」、「香港新聞傳媒管理中心」。香港政府新聞處亦從來冇發出所謂「香港新聞記者證」或「香港新聞工作者證」嘅統一版本。香港政府新聞處仲話，已將資料轉交警方進一步了解。
喂，若然有騙徒利用假記者證為非作歹，後果真係可大可小o架。假設有人冒充某某電視台嘅記者去勒索貪官，貪官反咬一口指控某某電視台刑事恐嚇，傳媒嘅公信力咪會大打折扣囉。到頭來，貪官有機會逍遙法外，電視台嘅收視率江河日下，以後有乜嘢大新聞報道都冇人理。
所以計功夫茶話齋，唔該香港警方查清查楚，有必要嘅時候要求內地公安提供協助，一舉殲滅製售假記者證嘅犯罪集團，嚴防假記者蠱惑人心！