前財經事務及庫務局常任秘書長（庫務）應耀康被視為官場其中一個叻人，之前喺財經事務及庫務局做「大內總管」工作，各個政策局要有新錢落袋都要過佢個關，但佢去年七月因為要照顧患病家人，所以提出無限期休假。據聞應耀康處理完家事後準備回巢政府，最新落腳點係過檔工作十分吃重嘅競爭事務委員會（競委會），如無意外好快開工做嘢添！
消息指，應耀康準備回巢政府嘅消息喺官場都流傳咗一陣，但由於依家無常秘職位空缺，政府一直諗緊有乜空缺畀應耀康出任，最新消息話佢可能過檔競委會幫手，至於具體工作同職銜仍有待最後敲定。不過，預計佢會成為競爭法前期落實工作嘅重要成員之一。
查實競委會上周舉行首次會議，競委會主席胡紅玉事前張揚初步要招聘五十人，其中總裁同高層會透過全球招聘，有官場中人估計，應耀康過檔競委會應係暫時性質，一旦有常秘空缺就好大機會叫番佢返去。政府發言人接受本報查詢時證實，應耀康會借調到競委會，又指呢個借調安排係屬於短暫安排，當競委會行政團隊履新後，相關工作會由行政團隊人員接手處理。