政情：蔣麗芸發爛渣鬧「同黨」
立法會尋日正式結束歷時多日嘅財政預算案「拉布戰」審議，好多建制派都發言批評四位拉布議員。其中建制派議員蔣麗芸（Ann）唔知係博出位定係冇準備，發言離晒題，又打斷泛民議員發言，結果被主席多次警告，阿Ann就發爛渣鬧主席冇念在黨友份上，「蝦得過就蝦」，激到主席紮紮跳。
話曾鈺成蝦佢
話說阿Ann發言時，除咗話唔認同拉布議員提出削減街道清潔開支外，又話唔同意要削減公務員薪金，希望將來唔使審議呢類修正案，又指斥拉布議員令立法會成為大輸家。佢又話政府嘅福利及教育開支不斷增加云云。此時曾鈺成開腔要求佢發言精簡，以及發言要以預算案內容為主。
阿Ann被主席多次警告後，發言更加亂晒龍，竟然將年份二○三○年講成二○○三年，即時被主席糾正。可能阿Ann連番遭受挫敗，於是發爛渣鬧主席話：「主席，雖然我哋係同黨，你蝦得過就蝦，既然你蝦咯，咁我都冇嘢講喇主席。」曾鈺成就話自己有責任執行議事規則。