立法會就財政預算案拉布多時，尋日終於「剪布」兼就七百幾項修訂進行表決。由於有修訂涉及削減行政會議員成員酬金，所以身兼行會成員嘅葉劉淑儀、李慧琼及林健鋒（Jeffrey）就因為直接涉及金錢利益，所以要喺表決時冇得投票兼要避席離場。
點知三位議員行咗出會議廳冇耐，就被召回會議廳。原來係主席搞錯表決次序，由原本表決削減特首辦開支，無啦啦跳咗去表決減行會成員酬金，結果又要叫番三個議員入去投票。梁美芬等人見狀，個個自動波企起身申報利益。主席見佢哋都唔知申報到幾時，終於就溫馨提示大家有金錢利益先至需要申報。
Jeffrey唔知係咪被人點唔順氣，就問主席如果有人提出削減立法會議員薪酬，到時咪冇議員投票？今次連主席都未能即時回應問題，Jeffrey算係威番次喇。