政情：大劉坐定粒六 澳門法院冇符
華人置業主席劉鑾雄（大劉）同南華足球隊足主商人羅傑承，捲入澳門歐文龍世紀巨貪案，因大劉三度稱病缺席應訊而再三押後，澳門法院又無法派澳門醫生來港診斷大劉健康狀況，搞到依家澳門司法部門都抓晒頭，無晒佢符，成單案企晒喺度。不過，你有你頭痕，大劉自己就繼續逍遙，滋油淡定四圍出沒，好似坐定粒六咁。尋日早上先到養和醫院探望兒子，之後佢又到灣仔「富豪飯堂」食大餐後先至施施然離開。
車上細讀《東方日報》
尋日早上約十時二十分，大劉到養和醫院探望佢同呂麗君個仔後上車，期間一度攞住《東方日報》細讀，但當發現有人影佢相時，就立即放低報紙，然後木無表情開車離開。咁緊張，似乎好關注時事新聞！及後到中午十二時五十分，佢又到灣仔富豪飯堂開大餐，但係佢喺大熱天時竟然着住長袖衫同中褸，雖然有人擔遮擋太陽都隱約見到佢滴汗。當被問及澳門法院唔接受佢醫生證明、之後應該點處理等問題時，佢就粒聲唔出，一支箭咁走入飯堂，直到近下午二時半才離開，期間繼續對各條問題充耳不聞。
澳門歐文龍世紀巨貪案震驚中港澳，澳門當局多次要求大劉應訊，但佢一直聲稱因病缺席要求延後審訊，直到最近當地法官當庭要求組成會診委員會，打算派醫生來港為佢評估健康狀況係咪適合出庭，但不消一會又發現，因為港澳兩地法制及專業認證唔同，澳門醫生唔係可以話來港就來港，變相形同宣告呢個做法告吹。
料牽連甚廣
好多人都估計，呢單世紀巨貪案一啲都唔簡單，牽連仲好大添，必然隱藏住好多不可告人秘密喇！不過，依家單世紀巨貪案就處於膠着狀態，澳門司法機關亦抓晒頭無乜好橋直情就企咗喺度，唔知點算！相反大劉就坐定粒六未驚過，日日健步如飛去食飯，認真逍遙自在。究竟呢單世紀巨貪案遲啲會否好似維基解密咁，將政商界更多千絲萬縷內容曝光於人前，大家就要繼續金睛火眼睇實，絕對唔可以走漏眼呀！