中環出更：紅魔訪港 盛事基金邀費Sir隨行
英超勁旅曼聯領隊費格遜（費Sir）宣布榮休之後，本港曼聯球迷唔止失落，仲非常失望，因為曼聯本來應承七月訪港踢表演賽，屆時費Sir分分鐘唔嚟。負責撥款邀請曼聯來港嘅盛事基金為避免令球迷熱情減退，決定去信要求費Sir就算唔做領隊，都要來香港行一轉喎。
盛事基金主席林健鋒（Jeffrey）話，一早知道呢啲國際級球會未必精銳盡出，所以當初合約已經寫明曼聯要有一定數目嘅一線球星訪港，除咗傷患之外唔可以無啦啦甩底，仲會講明每名球員上陣嘅時間，唔會踢唔夠十分鐘就被換走，總之避免入場球迷有被呃錢嘅感覺。不過，點都估唔到做領隊嘅費Sir會辭職，真係人算不如天算。
Jeffrey話，知道費Sir係曼聯嘅精神領袖，好多港人都鍾意佢，雖然盛事基金唔係主辦單位，只係負責撥款，但都希望港人入場時睇得開開心心，唔會掃興，已經要求主辦單位傑志去信曼聯，轉達港人想見到費Sir退隱前風采嘅意願。雖則費Sir唔再做領隊，但話晒都係曼聯親善大使，香港又有數以萬計曼聯粉絲，相信佢唔會漠視港人訴求嘅。
卓妮