中環出更：逛名店睇手袋 李妮刺探軍情
名牌手袋，冇女人會嫌多，珍藏近百個靚袋嘅博愛醫院副主席李妮（Lily）平時就愛逛名店搜尋新獵物，卓妮有日傍晚就見佢單拖橫掃金鐘太古廣場多間名店，行足個幾鐘，樂此不疲。原來Lily近月開設網上名牌手袋店，所以變身「手袋密探」，八卦最新手袋行情。
一身貴氣打扮嘅Lily，似乎鍾情意國名牌，卓妮見佢一支箭走入一間意國名牌手袋店內，仔細掃射新款式，店員見有貴客光臨，飛身上前招呼。Lily細心研究手袋皮質、手挽設計、車工等，十足專家。揀咗十分鐘後，佢就轉場再睇另一間，足足逛咗七、八間名店，依然好興奮，佢之所以咁勤力，並非為消磨時間，而係為知己知彼了解行情。
客人「想買你拎過嘅袋」
原來生意頭腦精嘅Lily，三個月前投資六位數字，與任職設計師嘅弟弟李毅合力開設網上名牌手袋店。Lily找來意國「地膽」好友幫手，入貨有門路，以優惠價錢搶客，而佢細佬就負責營運管理。開業幾個月，吸引唔少名媛幫襯，亦因此遇上千奇百怪客人。
Lily話，有太太買手袋時不用多睇實物，反而「欽點」Lily幫手揀，教埋點配襯；亦有太太對Lily拎過嘅「二手袋」情有獨鍾，每次看見Lily拎住某個手袋見報，就會致電Lily話：「我想買你拎過嗰個袋」，佢嘅吸引力認真大。除咗賣袋，Lily月前再引入一個意國鞋履名牌，睇嚟下次佢行街，要逛埋鞋舖先得嘞。
卓妮