同樣係吹氣藝術品，尖沙咀碼頭有一隻人人常歡笑嘅巨鴨，西九文化區有一坨人人齊皺眉嘅大便。西九嗰一坨吹氣大便叫做「複雜物堆」喎，創作者係美國藝術家Paul McCarthy，請恕功夫茶冇乜藝術細胞，真係唔識得欣賞咁複雜嘅乜乜物物堆堆囉。至於邊一個決定利用公共空間展出一坨公共藝術，答案當然係自把自為嘅西九管理局。
西九管理局除咗「引大便入關」之外，仲有一家嘢值得非議，就係慷納稅人之慨嚴重超支嘞。上個月立法會先至爆出一則消息，西九文化區嘅戲曲中心大幅超支，建築成本由十三億元增至二十七億，當時已經有議員質疑撥款將會好快用清光，擔心政府最終要包底，家陣果然不幸言中。西九管理局最新一次會議發放咗一份機密文件，估算報告顯示整體成本由二百一十六億元飆升至四百七十億，亦即係超支二百五十四億元，等於增加百分之一百一十七。
你知啦，立法會議員唔係人咁品，破口大罵嘅火氣愈來愈猛烈，動不動就連珠炮發鬧人無恥，如果將新增嘅二百五十四億元直接向立法會申請撥款，肯定會被剷上天花板，所以港式官僚想出一個避免淪為箭靶嘅折衷辦法。政務司司長林鄭月娥建議將部分大型工程交由政府包辦，並且延遲興建第二期大劇院以及中型劇場，務求將成本減至二百八十九億先至追加撥款，即使現時向立法會申請，亦只係追加比較溫和嘅八十億，而唔係非常得人驚嘅二百五十四億。
問題係，西九文化區嘅大型工程就算交由政府包辦，花費嘅每一分每一毫仍然係納稅人嘅血汗錢，所謂慳錢嘅計算方法純粹係掩人耳目嘅數字遊戲。亦即係話，特區政府根本把關不力，導致西九文化區變成一個填極都填唔平嘅無底深潭，官字兩個口嘅老爺奶奶視公共財產如無物。
計功夫茶話齋，西九嗰一坨吹氣大便簡直係一個凶兆，預示就算畀多二百幾億都未必一定水到渠成。你知啦，西九管理局最鍾意亂使冤枉錢，去年六月向瑞士收藏家Uli Sigg取得一千五百件中國當代藝術品，平均每件三百幾萬。不過香港油畫研究會主席林鳴崗質疑，大部分購入嘅藝術品係近十至二十年嘅貨色，藝術家知名度較低，作品每件可能只值幾十萬。林鳴崗斬釘截鐵咁話：「完全唔值，直情搵笨！」
離譜超支當然惹來訕笑，功夫茶求神拜佛，西九文化區落成嘅時候千祈唔好變成另一坨大便！