中環出更：大劉、李國寶前後腳開飯
華人置業主席劉鑾雄（大劉）同南華足球隊足主兼商人羅傑承，一同捲入嘅澳門歐文龍世紀巨貪案，因大劉三度稱病缺席應訊而再三押後。雖然大劉自稱有病，但佢近日頻頻到灣仔「富豪飯堂」食晏，尋日卓妮又見佢健步如飛咁去食飯，咁啱仲見到東亞銀行主席李國寶前後腳現身，莫非佢哋約埋一齊食飯密斟？
尋日中午約十二點半鐘，李國寶一支公坐車到灣仔富豪飯堂，約五分鐘後，大劉就同秘書抵達，一齊由座駕步出，喺攝氏二十九度大熱天時下，大劉仍着住長袖衫，頭耷耷、粒聲唔出咁步入飯堂。直至近下午兩點鐘，大劉用膳後先行離開，秘書則尾隨其後。
卓妮上前追問大劉一連串問題，包括母親節送咗啲乜嘢畀媽媽？下個月會否到澳門出庭？身體狀況如何？他一概唔回應，同時慢條斯理咁登上座駕坐定定，又用手抹抹面。至於李國寶則喺大劉離開後五分鐘先至離開。
澳當局稱不能派醫生來港會診
上月廿九日大劉因病缺席出庭，法官當庭宣布成立會診委員會，來港為大劉評估健康狀況。不過，澳門衞生局副局長鄭成業前日接受當地傳媒查詢時指出，因兩地法制及專業認證唔同，「唔係我哋（澳門醫生）話過去就可以過去」，形同宣告不能派醫生赴港會診。本港嘅醫院管理局及衞生署發言人亦指出，至今仍未有收到澳門有關部門提出要求香港方面協助評估大劉健康狀況一事。
卓妮