政情：八網難逃：小鳳愛小明
綽號「小明」嘅兒科醫生李家仁嘅兒歌唔單止啱小朋友聽，原來連殿堂級歌手都好欣賞佢嘅才華。李家仁話，早前一個早上，有位姓徐嘅女士致電診所搵過佢，不過當時佢仲未返到診所，於是就由診所護士代接。護士細問之下不得了，原來對方就係鼎鼎大名嘅金牌歌后徐小鳳。小鳳姐仲話，自己係「小明」嘅歌迷添！李醫生聞言不知幾咁開心，但佢都好謙虛咁話，係小鳳姐客氣先咁講啫！
歌壇紅人 惺惺相惜
李家仁坦言，與小鳳姐素未謀面，今次突然成為佢嘅偶像，真係受寵若驚。其實「小明」同小鳳姐雖然生於唔同年代，但都係歌壇紅人，互相賞識都唔出奇吖。唔知「小明」又鍾唔鍾意聽小鳳姐啲名曲呢？我哋就建議李醫生不妨搵小鳳姐同「小明」Jam番隻《小明與小鳳》，可能會擦出意想不到嘅火花喎。