廣福邨違泊 妨礙救援
大埔廣福邨住戶陳先生指出，廣志樓與廣崇樓之間的行車路常有車輛違例停泊，屋邨管理處雖有豎立告示，卻全無阻嚇力，部分車輛甚至會通宵停泊，對其他車輛造成阻礙，擔心會影響屋邨消防安全，「有告示冇執法，即係得個講字，啲人梗係唔驚啦！萬一有咩意外，啲車阻住消防車入嚟救援就大件事！」
街坊促管理處正視
廣福邨物業服務辦事處發言人表示，每日廿四小時均會派員巡查屋邨所有道路，監察車輛違泊情況，亦曾於上述位置採取多次扣押車輛行動，有關車主須繳交三百二十元罰款才可領回被扣押車輛。發言人又稱，過去一年曾接獲數宗相關投訴，過去兩個月共有六次鎖車紀錄。
「今朝返工經過，都仲見到有車泊喺度，根本冇改善過！」陳先生直指上址違泊情況持續，要求管理處嚴正處理問題，保持行車路暢通。