政府因應ＤＲ醫學美容集團事件成立咗個委員會，研究點樣區分醫療同美容程序，但委員會內嘅美容業代表質疑政府同醫學界針對佢哋，集體退出以示不滿，令相關工作幾近停頓。
最近更有疑似美容業人士廣發手機訊息，引述來自批發零售界立法會議員方剛嘅內幕消息，指政府有意趕絕美容業，呼籲大家聯署反對。不過，據聞方剛根本冇收過內幕消息，質疑有人趁佢唔喺香港，假冒佢名義搞聯署同收集個人資料。
有關手機訊息指出，方剛喺日前接獲政府回覆，話除咗彩光之外，其他之前美容業幫客戶做開嘅療程，包括Peel、MYS、針清、Laser等，全部都會被界定為醫療程序，需由執業醫生操作或授權執行，變相趕絕美容業界，令佢哋集體失業，呼籲大家搵埋家人朋友一齊簽名反對，仲要提供埋聯署人嘅身份證頭四個英文字母加數字添！
我哋想就事件問番方剛回應，但佢咁啱唔喺香港。有知情人士話，方剛根本冇收過呢個所謂嘅內幕消息，亦冇份策動業界搞聯署，就算搞聯署都唔會要人提供身份證號碼咁離譜，雖然方剛一直有幫開美容業界，但希望相關人士唔好屈佢，用番自己嘅名義堂堂正正搞嘢喎。