立法會功能界別存廢已經討論多年，一直有人認為香港應該效法外國民主國家咁廢除所有功能界別，但勢估唔到在港定居嘅外國人就唔係咁諗。香港澳洲商會一班會員日前同新民黨立法會議員葉劉淑儀食飯，席間就話香港功能界別唔夠代表性，希望增設一個專為外國商會嘅界別。
葉劉透露，本來午宴議題係講普選，但點知在席人士麻麻哋有興趣，反而緊張功能界別存廢多啲。佢話聽完大家意見後先至知道，原來在港嘅澳洲籍人士有成八萬人咁多，唔少人都活躍商界同專業界別，佢哋有聲音認為現時兩個商界議席，即係香港總商會及中華總商會嘅代表都冇代國際商會發聲，澳洲商會只能靠自己接觸政府。
呢班商會會員認為，香港過去賴以成功係自由發展，如果將來咩都受到限制，又標準工時又最低工資，香港競爭力只會愈來愈低。偏偏現時立法會過分政治化，功能界別只為本地商界發聲，所以澳洲商會中人冀增一個外國商會界別，由英、美、澳等商會聯手選出代表，幫居港外商發聲。唔知現有兩個商會界別對新增界別有乜意見呢？