政情：林奮強：香港要發展「環保戰士」撐填海
自偷步賣樓風波後休假多月嘅行政會議成員林奮強，尋日喺政府填海諮詢論壇低調現身，實行休假都照撐政府，仲自爆做咗三十年環保戰士。佢發言時話，自己三十幾年前讀大學時，都係「環保人」，鍾意着環保潮tee，甚至為咗將奶樽回收，不惜踩單車去遠處回收場。
不過，講到底佢都係支持填海，皆因香港要發展，仲話珠江三角洲水域有二千五百條白海豚，香港水域就只有八十條，索性呼籲內地減少污染好過。
「搞掂自己問題」先返行會
咁林奮強休假咁耐，幾時先回歸行會呢？佢就話「要搞掂自己嘅問題先」，適當嘅時候就會向外公布喎。
咁近期有咩搞作呢？佢笑笑口話做緊政策研究，研究幫香港社會突破「樽頸位」，而佢創辦嘅智庫組織「黃金五十」，將會喺個半月內發表研究結果，尋日佢仲帶咗幾個「黃金五十」嘅「八十後」去見識，班後生仔女滔滔不絕積極發言，仲話土地發展就係八十後嘅將來喎。