政情：釋智慧點化佔中青年
近期社會就政改及「佔領中環」行動鬧得熱烘烘，正反意見都幾乎聽勻晒喇，但尋日就傳出一把久違了的聲音，就係寶蓮禪寺住持釋智慧大和尚。智慧法師兩年前曾中風入院，雖然後期已慢慢康復過來，但評論政事或社會時事已大為減少，尋日佢主持寶蓮禪寺浴佛慶典後，聞及「佔領中環」行動都忍唔住講番兩句，除咗呼籲社會多啲發表撐政府嘅言論外，仲拋下一句：「香港人只要有飯食、有工開、有地方住已經最好喇！」
籲社會多撐政府
尋日見智慧法師再冇手執扶杖，精神狀態唔錯，但當佢一見到記者時，就慨嘆自己身體大不如前，中風後仍可見到大家感到好開心。言語間，見法師眼濕濕，又以手指拭淚，好似有種死過翻生嘅感慨。雖然智慧法師話依家好多事都唔識，冇以前咁叻，但當被問到最近社會出現嘅矛盾及對「佔領中環」行動嘅睇法，法師就忍唔住重拾昔日以佛偈論政嘅本領，以幾句說話交代自己嘅睇法。
智慧法師話，社會要多啲發表支持政府嘅言論，否則政府會做得好辛苦，因為香港人只要有飯食、有工開、有地方住已經最好喇！佢仲話，以前啲後生都會聽吓佢講嘢，但依家啲後生好多都反政府，未讀大學就鬧政府，叫佢點講嘢呢？呢番說話聽落好玄，似乎係暗示啲後生要做好本分。
大嶼山起樓最好
政府多年前大規模發展昂坪，智慧法師曾經封山抗議，依家政府話要大搞大嶼山，推行「港貨專區」配合港珠澳大橋啟用，唔知法師又會唔會以激烈行動反對呢？法師話，大嶼山大把地，用嚟起樓最好。至於昂坪一帶嘅發展，佢就講佛偈話「禮佛一拜，滅罪河沙；念佛一聲，福增無量」，如果冇政府呢啲建設，當然寶蓮禪寺會寧靜好多，但既然事情發生咗，就無話應唔應該喎。
智慧法師快將八十二歲，佢話喺寶蓮禪寺嘅日子，已經做咗唔少事，如創辦大嶼山第一所中學及老人院等，新建嘅萬佛寶典又將於明年開光，所以無論咩時候離開人間已經好心足，最重要係人人為我，我為人人。至於接班人呢？大師就話大把喎，雖然佢冇乜讀過書，但都供晒十個徒弟讀博士，依家個個都係博士級數。原來個個都係人才，唔怪得早前傳出接班爭拗喇。