中環出更：豪掟逾千萬 黃家和法國做莊主
依家有閒錢除咗可以投資商舖同黃金外，仲有人選擇投資酒莊。餐飲聯業協會會長黃家和（Simon）就花八位數字港元，喺法國波爾多買咗個酒莊，一嘗做莊主滋味。Simon經營紅酒生意多年，飲盡頂級佳釀，眼見歐洲優質酒莊近年紛紛割價求售，實在為之心動。經多次視察，近日佢終於扑錘購入一個有三百年歷史、面積達九公頃嘅酒莊，五一勞動節當日前往接管莊園。
擬發展成旅遊景點
首次升呢做酒莊莊主，Simon第一件事係着番對水靴，捲起衫袖，穿梭葡萄園檢查葡萄生長情況。咪睇Simon係城市人，佢之前開過有機耕種農場，係半個「農友」。佢向卓妮介紹話，依家正值五月，係葡萄發芽時，要等到九月底先有收成，屆時會邀請香港班老友去酒莊，靚酒任飲唔嬲。
跑到老遠買酒莊，點解唔索性將筆錢投資香港樓市？一切源於對法國情有獨鍾。Simon笑言，每次踏進莊園，都會勾起當年讀大學時拎起支筆學油畫嘅浪漫情懷。佢打算將酒莊發展成旅遊景點，又大搞紅酒培訓班同試酒會，睇嚟佢想升呢做埋「紅酒大亨」喎。
卓妮