中環出更：陳振彬愛駒爆冷 帶挈曾Sir贏錢
沙田馬場昨舉行主席賽馬日，警務處處長曾偉雄（曾Sir）應馬會邀請，與甚少露面嘅太太十指緊扣入場食飯。咁啱同枱老友、港區全國人大代表陳振彬（Bunny）匹愛駒「寶寶快車」喺「蒲偉士碟」四班千二米泥地賽中，以四十九倍賠率爆冷跑出，帶挈曾Sir齊齊拉頭馬兼一嘗捧「碟」滋味。曾Sir自爆買咗二十元「位置」撐Bunny，扣除本金後贏咗二百二十元彩金，佢笑問卓妮：「買二十蚊，夠唔夠健康呀？」
掛住拉頭馬 冷落嬌妻
曾Sir話，因為Bunny匹馬太冷門，唔敢買獨贏，只係小注怡情，旨在「警民同樂」喎！Bunny坦言，賽事開跑前聽練馬師分析話，愛駒排第十二檔，加上往績從未入過三甲，勝出機會微乎其微，於是喺馬匹亮相圈睇完愛駒之後，即返回廂房繼續觀賽。點知「寶寶快車」獲幸運之神眷顧，後來居上首衝終點，Bunny於是拉埋身旁嘅曾Sir落樓拉頭馬，曾Sir仲因為開心得滯，「唔覺意」漏低咗嬌妻喺樓上添。
Bunny話，佢都有「例牌」落注買獨贏及位置，加上捧盃嘅近四十萬元獎金，真係飲得杯落。佢笑言，會將手上獎盃送畀太太，當做母親節禮物。
卓妮同場仲見到明德學院校董會主席張永霖夫婦、恒生銀行女大班李慧敏及丈夫袁天凡等名人夫妻現身，馬會大董周永健則帶埋太太胡慕芳同喺外國修讀法律嘅公子Justin，一家三口預祝母親節，認真溫馨。
卓妮