垃圾禍患隨處見 垃圾官僚隱晒形

功夫茶日前啱啱提過，內地實施新例禁止「洋垃圾」進口，香港作為中轉站，首當其衝，面臨被洋垃圾塞爆危機。話口未完，又有另一批垃圾湧現嘞，就係大量醫療廢物隨波逐流沖上大嶼山愉景灣岸灘，對海洋生態及附近居民構成嚴重威脅。相對於洋垃圾，醫療垃圾危害性更加大。

呢，本報記者視察愉景灣沿岸沙灘發現，呢片世外桃源已經淪為醫療廢物垃圾崗。藥袋、藥樽、藥膏、口罩……醫療用品，應有盡有，連懷疑殘留血液嘅針筒都有添，真係毒你唔死嚇死你。專家就話嘞，醫療廢物印有簡體字，九成九由內地漂流而下；而區議員就踢爆，多次要求港府正視問題，但只係得到敷衍了事嘅垃圾回覆，擔心醫療廢物唔清理，遲早危及居民健康安全。

係人都知，醫療廢物對人體有害，港產官僚居然闊佬懶理，關人個關，唔通佢哋仲廢過啲醫療廢物？就算撇開公眾健康問題唔講，沙灘滿布垃圾，既有礙觀瞻，又影響衞生，都有問題喇，港產官僚收到投訴都話之你，咁嘅官僚作風簡直就係垃圾中嘅垃圾！

嗱嗱嗱，垃圾問題禍患處處，受害嘅唔止愉景灣o架。本報收到投訴，元朗鳳群街垃圾站變咗不折不扣嘅垃圾崗，門外晚晚都堆積逾百袋垃圾，搞到臭氣熏天，鼠輩橫行，令到附近居民大受困擾。點解會咁？咪就係官僚為患囉，區內收集垃圾嘅時間高峰期喺凌晨時分，但係垃圾站晚上十一點半就關門，於是就衍生出鬧市垃圾山呢幕街頭奇景嘞，區議員投訴過好多次o架嘞，點知食環署又係闊佬懶理，「關門個關」，你話嘞，香港係咪想唔變臭港都難吖！

一件污，兩件穢，三件好閉翳。洋垃圾有入無出，醫療廢物布滿沙灘，垃圾站臭氣熏天，香港淪落到咁嘅地步，究竟垃圾問題有無人處理o架？港府高層與其一味做清潔騷，不如督促食環署認認真真清理垃圾仲好啦，否則，「家是香港」遲早變成「家是垃圾」嘅咋！

垃圾禍患隨處見，垃圾官僚隱晒形。咪話功夫茶唔提醒，港產官僚快啲做好自己份工，處理好垃圾問題啦，貪曾同貪湯已經將香港官場搞到烏煙瘴氣o架嘞，如果連環境衞生都冤崩爛臭，香港唔止變臭港，仲隨時變死港添呀！