政情：黃錦星遲到 議員有得抖
立法會審議財政預算案「拉布」拉到天昏地暗，仲累高官搞錯開會時間。立法會尋日首先進行三條法案嘅首讀同二讀，原本喺民政事務局局長曾德成同財經事務及庫務局局長陳家強發言後，就輪到環境局局長黃錦星（KS）就擴大膠袋徵費計劃嘅《產品環保責任（修訂）條例草案》發言，但此時環顧議事廳內，都搵唔到KS嘅蹤影，立法會主席曾鈺成惟有無奈宣布暫停會議。
以為有口頭質詢可遲入
唔少議員見到主席突然暫停會議，都覺得非常驚訝，有議員仲以為主席已經手起刀落狠狠「剪布」。大家等咗五分鐘，終於等到KS施施然行入會議廳開會。KS嘅新聞秘書解釋，KS並非唔記得去開會，只係因為佢哋以為尋日大會有口頭質詢，所以諗住局長可以遲少少先去立法會囉。
新聞秘書坦言，當佢哋喺電視上見到陳家強發言，都仲未知發生咩事，直到主席叫KS發言，環境局中人先心知不妙，於是就嗱嗱聲叫KS搭升降機落樓趕過去立法會開會。雖然今次KS同新聞秘書都懵盛盛，但就為一眾議員提供咗五分鐘休息時間，喺馬拉松式嘅拉布會議過程中，都算係一滴甘露嘅。