政情：鍾國斌想去南韓「修皮」
立法會紡織及製衣界議員鍾國斌（Felix）早前牽頭成立「服裝發展委員會」，話要將深水埗打造成南韓東大門，所以上星期佢就帶隊去南韓考察當地紡織業，八月中仲可能去埋北韓添，認真有冒險精神。Felix話，南韓製衣業以效率見稱，唔少廠商廿四小時開工，由落單到提貨都只係三日搞掂，快過香港好多，如果香港實施標準工時，只會更加比下去。
上周考察當地紡織業
Felix坦言，雖然香港紡織品都可靠品質領先，但真係唔夠南韓多元化，好似南韓有製造商生產避彈衣物料，香港廠商就冇可能發展軍事物料，所以某程度唔可以將南韓模式照搬過香港。
除咗考察當地企業，Felix話今次最大得着係發現南韓一街都係美女，個個樣貌標致清秀，但最慘係個個都差唔多樣，街頭同街尾都係一樣，證明韓國整容工業真係發達，仲話下次有機會都想去「修皮」喎！