政情：蔣麗芸食齋仲好火
立法會「拉布」四子自上月再發動拉布戰以來，全體議員從此被困會議廳，日夜黐住張櫈唔敢郁。部分議員有感由朝到晚困坐頹會，唔食得健康啲睇怕命都短幾年，於是向秘書處提議，增加宴會廳素菜比例，尋日開始試行。全場唯一食素嘅葛珮帆（EQ）自然最開心，高叫終於有啖好食之外，仲踢爆黨友蔣麗芸（Ann）上月起亦都偷偷哋轉食素，想話借機收吓火，並順勢搣甩「政壇元秋」之惡名。
拉布戰唔掩耳 「隨時腦癱」
阿Ann自出任議員以來，經常同梁國雄（長毛）喺議會內外舌戰連連，今次倣效EQ靠食素下火似乎未見成效。好似兩人早兩個星期喺《城市論壇》首次碰頭已經火花四濺，面對長毛嘅專業挑機好快就按捺不住，火氣十足。日前長毛喺拉布期間發言，阿Ann亦沉唔住氣寧願用手掩耳唔聽，更喺社交網站大呻唔掩耳抖抖「真係隨時腦癱」。阿Ann嘅下火配方唔多見效之餘，仲隨時引致生命危險。
咁究竟呢個素菜餐單搞唔搞得起呢？自稱「食肉獸」嘅飲食界張宇人，就話除咗咖喱牛腩同貢丸米線外，乜嘢素菜都得唔到佢嘅垂青，寧願食飯後甜品都唔吼素菜，但就認同秘書處今次方向正確。另一「食肉獸」進出口界黃定光（象哥）就嫌啲素菜「有好多都用油整」，建議食白灼青菜好過。象哥連入門級嘅羅漢齋都嫌油膩，就想越級挑戰白灼青菜，真係唔知佢可以頂到幾多餐。
最近為咗拉布爭議，夾喺泛民、建制同政府中間做磨心嘅主席曾鈺成，食飯時間都「來也匆匆、去也匆匆」，日前食飯期間仲要畀長毛衝擊，所以連宴會廳多咗素菜選擇都唔知。無他嘅，剪布日子遙遙無期，曾鈺成再係咁畀拉布四子日夜折磨，真係食龍肉都冇味。
立會試增素菜
立法會秘書長陳維安透露，今次新加素菜包括素粉果、素咕嚕球同羅漢齋等，目前只係試驗性質，會唔會納入常規要視乎議員反應。由於膳食費用係由議員自掏荷包找數，唔涉及公帑開支。因此，議員鍾意點食、食幾豪都得，最緊要係每個月準時找數就得喇。