中環出更：董吳玲玲搞珠寶展騷Quali
靈氣優雅嘅玉石珠寶，點只女士們愛不釋手？福建社團聯會副主席董吳玲玲最近搞咗個珠寶展，騷盡自家設計嘅靚翡翠及珍珠首飾，全國政協委員盧文端同新界社團聯會理事長陳勇等大男人，都抽空去捧場。期間盧文端對玉石全盒擺設最感興趣，內有幾可亂真嘅花生、合桃及腰果等，佢仲拎起瓜子作啃咬狀，認真搞笑。
董太話，全盒內嘅果仁及餅乾做工十分精緻，要揀選適當顏色嘅玉石雕琢成適當嘅食物，都幾考究，所以得來不易。近年靚翡翠愈來愈難求，董太認為翡翠投資及扮靚價值兼備，幾時都值得珍藏。志在捧場嘅盧文端坦言，好少買珠寶首飾。但買嚟氹老婆都要啩？佢笑笑口話，太太鍾意去拍賣行尋寶，仲有齊幾間大拍賣行嘅戶口添！
陳勇妻係董太中學校友
最近活躍於政壇嘅港區全國人大代表陳勇，同董太喺新界地區工作時相識，佢都係福建人，咁啱太太與董太都係晉江中學嘅校友，親上加親，梗係要去捧場。爭相去睇靚嘢嘅仲有南京總會會長張心瑜及仁愛堂副主席羅台秦等人。
卓妮