中環出更：陳智思變導遊 帶外賓逛中環
香港係好客之都，有「公職王」之稱嘅行政會議成員、亞洲金融集團總裁陳智思（Bernard）就示範好客之道，前日於辦公時間仍抽空做導遊，帶幾個賓客游走中環，一盡地主之誼。卓妮見佢哋喺中環ifc對出嘅行人天橋邊行邊傾，期間傾到指手畫腳，好落力咁介紹附近環境。
前日下午近三點鐘，Bernard與幾名身穿西裝、分別係兩名華籍及一名外籍男士，一同由ifc步出，經行人天橋前往環球大廈商場。佢哋每行兩步就停低密密傾，Bernard儼如導賞團導遊咁，手口並用地向身邊男士講解附近建築物及主要通道。幾位男士好耐心咁聆聽，本來兩分鐘就行完嘅路程，結果花咗十分鐘。
穿梭商廈 介紹「吉」舖現象
接住佢哋搭電梯上環球商場二樓兜咗一圈，最後停喺一間「吉」舖外研究一番，莫非幾位男士有興趣投資舖位？抑或Bernard係業主想放租呢？最後一行人離開商場，乘搭升降機到環球大廈上面嘅公司寫字樓。
卓妮其後致電向Bernard了解，佢話當日有一班海外嘉賓到訪其公司，於是順道帶賓客到處參觀。Bernard笑言，環球商場內有唔少菲律賓及印尼特色商舖，可謂各種族喺香港求同存異嘅特色之一，值得一看。至於點解對間「吉」舖咁有興趣，佢解釋，租金貴都係本土特色，於是同賓客講，舖租貴到令小商戶迫遷喎。
卓妮