消防處嘅神聖任務係救火救人，名副其實火裏來火裏去，消防員嘅英雄形象深入民心。之但係好可惜，消防處近年問題多多，烏龍百出，唔係壞車死火，就係設備失靈，一次又一次令人擔心延誤救援。
呢嗱嗱嗱，消防處又嚟傢伙，今次出事嘅係通訊設備。該處耗資一億七千萬元引入嘅數碼化無線電通訊系統，以及五億五千幾萬元購置嘅第三代調派系統，五月初相繼死機，仲要係連續咁死，搞到市民嘅生命安全好冇保障。
上星期三中午喎，無線電通訊系統突然故障，部分救護員無法同通訊中心聯絡，惟有出動手提電話應急。問題係，通訊中心嘅電話優先接聽九九九緊急求助，打電話問功課嘅救護員必須排長龍癡癡地等，一個唔覺意就會累及無辜，延誤救援都唔知搵邊個算帳。通訊系統死機四粒鐘之後回復正常，不過非常不幸，翌日朝早舊病復發，再次死機半個小時。
失去聯絡禍不單行，通訊中心嘅第三代調派系統喺上星期六傍晚故障半粒鐘。當時成個系統癱瘓，消防車同救護車嘅調派變成倒瀉籮蟹，控制組人員迫於無奈打電話教功課，逐間消防局通知，逐架救護車溝通，相關人等手忙腳亂一頭煙。
救火救人就好比同死神打仗，調兵遣將貴乎神速，點可以容許通訊系統同調派系統失靈o架？消防處救護員會主席陳仕祺指出，第三代調派系統投入服務八年以來幾乎每個月都有故障，搞到救護員有時未能夠做到十二分鐘到達事發現場。消防控制組職員會主席陳健麟就話嘞，調派系統最好升級至第四代，否則無法應付日益增加嘅緊急召喚。
其實計功夫茶話齋，最需要升級嘅係消防處管理層嘅腦袋，假如管理層嘅腦袋持續處於閉塞嘅狀態，任何設備都會出現失靈嘅尷尬局面。功夫茶唔係亂噏o架，大家記唔記得消防處經常浪費公帑買錯車呀？處方斥資七百幾萬購入俗稱「變形金剛」嘅流動指揮車，居然因為超重而唔可以合法行駛喎。○八年仲搞笑，花費七千萬購入十七架法國製油壓升降台消防車，新簇簇嘅貴價車竟然射水無力喎，唔知係買家蠢定係賣家奸。至於消防處轄下嘅救護車，周不時半路中途跪低拋錨，歸根究柢就係管理不善嘅惡劣後果，病人隨時痛失獲救嘅機會。
現任消防處處長係乜水呢？冇錯嘞，係陳楚鑫先生。功夫茶懇請陳處長身先士卒換腦袋，自我增值將智力系統升級，否則乜鬼嘢通訊系統呀，乜鬼嘢調派系統呀，即使更新一樣會失靈o架咋！