政情：今日你上鏡：曾鈺成示範「剪布」失敗

立法會審議財政預算案「拉布」半個月，建制派有唔少聲音叫立法會主席曾鈺成狠狠「剪布」，等佢哋唔使再罰坐。不過，剪布邊有咁容易吖？尋日曾鈺成出席香港華人革新協會會慶時，就「示範」畀大家睇剪布有幾難。話說協會會長林耀文致辭時特別祝願曾鈺成早日解決拉布事件，之後大家就剪綵慶祝，點知協會預備嘅紅色彩帶成塊布咁厚，曾鈺成就名副其實由剪綵變剪布。雖然佢喺立法會好有剪布經驗，但對住塊真布就剪極都剪唔斷，最後要換過把鉸剪先搞掂，認真尷尬。同場嘅立法會議員鍾樹根就笑騎騎、意有所指咁話：「剪布真係好困難！」