「貪曾」前特首曾蔭權爵士一心諗住喺「深圳禮賓府」安享晚年，但被東方報業集團獨家踢爆佢濫權廉租豪宅後，貪曾最後無可奈何焗住退租，好似過街老鼠咁周圍搵地方退休後落腳。我哋前日再報道「深圳禮賓府」已經豪裝完成，當中嘅落地玻璃全景觀浴室，更加安裝咗一個德國名牌高智能電動按摩浴缸，望住后海灣景色伴浴，真係人生一大樂事。不過，最悲哀係貪曾睇住「深圳禮賓府」完工都係無福消受，只係得個「睇」字同「恨」字，或者佢得閒發吓白日夢，先至享受到呢種舒適奢華嘅退休生活喇！
