政情：EQ大輝鬥搶鄉里票
工業界立法會議員林大輝今年初靜靜雞加入沙田政團公民力量，實行為轉戰下屆立法會直選鋪路。沙田區議員出身、循新界東當選嘅葛珮帆（EQ）下屆好可能要同大輝對撼，加上兩人都係潮州人，票源重疊，分分鐘要鬥搶鄉里票。不過，EQ就話冇有怕，聲言有競爭先會有進步，仲話至多呼籲男鄉親投票畀大輝，女鄉親投畀自己喎。
EQ上任過百日先有動議
EQ仲話，計落自己可能有着數，因為香港唔止女人多，連女選民都係多過男選民咁話。不過，到時配票係咪咁理想真係冇人知，加上落場參選冇情講，候選人唔係應該乜嘢票源都要搶晒嘅咩？仲玩男女選民分票咁禮讓？
另外，早前有個調查話EQ係最懶嘅新丁議員之一，佢就話要平反，話調查機構以議員上任一百日劃界，話佢上任一百日都未有提動議，但其實佢喺第一百零五日提咗，所以一啲都唔覺自己懶喎。