政情：鄭承隆網上發牢騷
從政係一場馬拉松式嘅長命仗，只要一日唔認輸就可以繼續玩。新民黨嘅荃灣委任區議員趙公梃上月突然辭職，政界即時傳出由同屬新民黨嘅前仁濟醫院主席鄭承隆（Edwin）補上，點知最新消息係荃灣區議會反對由該黨「世襲」委任議席，令Edwin失落委任議席。咁啱尋日佢喺網上發牢騷話自己「太累」，唔通佢收到風而慨嘆？
大呻自己近日太攰
本來政府委任Edwin做議員嘅消息甚囂塵上，話晒佢都係前仁濟主席，但政府委任邊個，其實都係分餅仔，由於該黨喺荃灣區內得田北辰一人，其他議員均反對再委任畀該黨，政府衡量過後，無理由為咗一個新民黨，而得失成個荃灣區議會，所以最終都唔畀Edwin做。
Edwin尋日就喺社交網站呻自己近日太累，因為有人將問題、煩惱、工作、責任一一推畀佢，無人諗過佢自己都會有同樣嘅煩惱同問題。佢呢堆牢騷同失落委任議席有無關係就無人知，但從政真係唔可以咁短視，Edwin不妨睇吓黨主席葉劉淑儀當年落台道歉、避走英國進修，現時咪又係風風光光做立法會兼行政會議雙料議員。