政情：葉劉暗寸「妹妹」 唔打Duck
正在香港打躉嘅黃色巨型橡皮鴨令全城瘋狂，不論男女老幼「睇鴨」之聲不絕於耳，連行政會議成員葉劉淑儀都大讚佢發揮正能量，仲不點名暗寸被佢形容為「妹妹」、政務司司長林鄭月娥牽頭嘅「家是香港」黯然失色，更甚係叫林鄭向鴨爸爸取經。正所謂「一『鴨』知秋」，睇怕葉劉同林鄭嘅關係，隨着時日又發生微妙變化喇！
港缺歡樂新鮮感
林鄭喺上月底啟動「家是香港」，幾乎所有政府部門都要「落水」，旗海更喺港九新界隨處可見，但由於各界反應一般，發放正能量相信有排先煲得起。就喺呢個正能量「旁落一邊」之際，黃色巨鴨在本月初喺香港橫破維港，「睇鴨」變成咗各階層嘅共通語言，如果未睇過就隨時搭唔上嘴，就連葉劉都湊熱鬧，尋日喺社交網站發表「鴨‧在香港」嘅文章。
不過，咪以為葉劉講巨鴨同普羅市民一樣係人云亦云，其實佢借巨鴨月旦時事，一切都係暗藏政治寓意。葉劉嘅文章末特別提到發揮正能量，形容近年來香港整個社會充斥許多爭拗及負面新聞，例如佔領中環、佔領碼頭等，甚至一向注重廉潔嘅港府亦有貪腐醜聞，情況有啲似一些議員所講「禮崩樂壞」，因此黃色巨鴨嘅來臨，帶來歡樂及新鮮感，這些正正是香港近年最欠缺嘅東西。
促向鴨爸爸取經
其後葉劉更有的放矢，借巨鴨暗寸「妹妹」林鄭，直言相比之下，標榜為香港注入正能量、加強社會凝聚力嘅「家是香港」黯然失色，並指看來項目嘅始創者，要向鴨爸爸Florentijn Hofman取經喎。唔單止咁，葉劉喺文中仲大讚議員范國威搞「睇巨鴨食片皮鴨」街坊團有市場觸覺，睇嚟林鄭未向鴨爸爸取經前，可以先向范國威偷師。話說回來，葉劉之前獲委任為行會成員，看似同林鄭等主要官員「同坐一條船」，不過喺民意民情當前，呢對「雙生兒」嘅意見看法或不盡相同，睇怕未來只會有更多隔空過招。