中環出更：季玉年：投資藝術品不如玩股
投資方式五花八門，除咗買金買銀買磚頭，連藝術品都難逃投資者嘅慧眼。不過，著名收藏家季玉年（Catherine）就認為，藝術品嘅主要價值在於精神層次，而投資藝術品亦非穩賺不蝕，盲目入貨隨時損手，況且藝術家面對心頭好如何升值都未必願意割愛出售，所以若以金錢回報而言，炒賣股票會更好賺喎。
鍾情趙無極畫風 拒割愛
Catherine透露，佢都有收藏著名畫家趙無極嘅畫作，由於趙無極剛於上月仙遊，按理遺作亦都價值不菲。不過，佢話大師嘅中西合璧繪畫風格令佢鍾情，閒來細賞誠一樂事，所以呢批珍藏無論有幾值錢都唔捨得割愛咁話。
雖然Catherine唔鼓勵投資藝術品賺大錢，但佢亦以經濟角度嚟分析藝術發展趨勢，佢話歐美藝術能夠領風氣之先，原因係過往西方有一段經濟蓬勃時期。不過，隨着亞洲地區經濟崛起，藝術文化亦肯定蒸蒸日上，因為民眾只要衣食無憂，至有餘暇去創造或欣賞藝術文化，而佢旗下畫廊亦由售賣西洋畫改為全力推介亞洲藝術家嘅作品。