中環出更：才女成功之道 比努力更努力
要做個成功嘅事業型女性，難免會犧牲私人時間，但換來嘅滿足感，足夠令人忘卻辛酸。至今仍係單身嘅會計師公會首位女會長趙麗娟（Susanna）話，當年佢喺英國培訓，要先過兩大關，即係國籍同性別，縱使與男性同等職級，仍要加倍付出努力，先至有今時今日嘅地位。
由城市女青年商會舉辦嘅年度全港時尚專業女性選舉，今年由Susanna擔任首席評審，佢話女性未來喺業界發展嘅路途會更順暢，事關港交所將於九月實行性別、年齡、技能等方面多元化平衡，間接鼓勵女性地位嘅提升。佢話，依家公會內嘅女性會員數目比以往大幅增加，已與男性數目相等，可見女性地位喺職場上愈見重要。
李煥明全靠父母支持
著名時裝設計師余嫿（Mary）、「蜘蛛女」鄭麗莎、IT界才女Autodesk港澳地區區域總監李煥明（Wendy）等幾位得過獎嘅才女都有出席日前活動開幕禮，仲即場分享成功之道。Wendy話，佢屋企年前已舉家移民溫哥華，但自己為咗份工，獨留香港發展，幸而獲得父母全力支持。佢笑言，冇因此與父母疏離，皆因父母好追得上潮流，不時喺社交網站追蹤佢嘅動向喎。
青年聯會常務會董蔡敏思都有出席，佢係選舉經費嘅贊助人之一。母親節快到，已為人母嘅佢講起愛女就甜絲絲，佢話囡囡每年都會為佢製造驚喜，最難忘係食到囡囡親手製作嘅愛心蛋糕。卓妮仲見到「鮮花公主」龔嬿，原來佢正心思思想報名參加今次選舉，作為老友嘅Wendy拍心口支持。
卓妮